السبت 10 يناير 2009

3 Mar

بصراحة مش لاقية عنوان تاني غير التاريخ..اصله كان يوم “تاريخي” …غريب هحكي علية اهه…. خليكو معايا

خالتو فاتن الساعة 3 الظهر جت عندنا وطلبت حد يقيس الضغط لانها تعبانة

الساعة 3 وربع ماما كانت بتعيط واخواتي بيندهوني (ساندي الحقينا(كلمي الاسعاف

حد يعمل حاجة ماسكة السماعة بكلم الاسعاف عقبال ما ردوا عليا طلعت عيني الحقوني مرة واحدة وقعت مننا وقعت مننا ..اخدوا العنوان طلعتلهم بره

خالتو فاتن نايمة علي الكنبة وبجد ده حقيقي بتقول الشهادة ..خالتو فاتن (ام امي)بتقول الشهادة قدامنا

الراجل ايلي جه من الصيدلية ماسك جهاز الضغط وواقف جنب الحيطة بعيد يقول الاسعاف (ماشاء الله عليه الراجل الوحيد وايلي المفروض عنده اكثر خبرة في البيت جتله حالة صدمة ولزق في الحيطة)

وامي جنب خالتو بتعيط ..ماسكة ايديها مش عايزة تسيبها ..اكنها ماسكة اخر خيط في روحها

بتعيط زي الاطفال ..وانا ماسكة نفسي من العياط ..اصل مينفعش اكبر اتنين في البيت يعيطوا ..وماما بتعيط زي الاطفال ..زي اما الطفل بيشوف امه مسافرة ..محضرة الشنطة اهه ومسافرة ..بتحضنهم حضن اخير ..وبتوصيهم الوصية الاخيرة ..,مسافرة خلاص هتسبهم لوحدهم في الدنيا

اصل خالتو فاتن بالنسبة لماما حاجة تانية ..ام ..ام بجد اصلية مش تايواني ..اخت شالت هم وحمل وغم عنهم وهم صغيرين ..اصل خالتو فاتن هي الكتف الحنين ايلي بيهنن ويهون علي امي ..معاها بحس كتير ان ماما بتدلع ..وساعات كمان بتزيد في الدلع عشان عارفة ان فاتن موجودة ..بترجع صغيرة تاني..اصل امها معاها ..فا كل ده يروح في ثانية ..!من غير اي انذارات ولا حتي نور صغير ..كان صعب علي امي اوي

خالتو عينيها ثبتت في مكان واحد وسمعنا روحها بتحشرج واطرافها بتتقل

وسكوت

 

 

شوية مياة بسكر وملح وكل حاجة اتسحبوا بشويش علي شفايف خالتو

سمعنا صوت نفسها بيرجع

فاتت تلت ساعة والاسعاف مجاش

واخيرا جه..جم لوحديهم من غير دكتور ..فين الدكتور؟اصلكم مقولتوش الطلب بدكتور (حسسوني اني طلبت سيزر سالاد ونسيت اقول حتة ولا حتتين(بجد

المهم خالتو فاقت ..بعد ما كانت خلاص راحت مننا

شوية وخالتو وخالو جم ..هم وماما وقفوا حولين خالتو فاتن وبيعيطوا

انا واقفة بعيد عنهم في ركن في الاوضة بصالهم وشايفة التالي

اربع اطفال ..بجد شفتهم صغروا قدامي

ماما رجعت طفلة عندها 5 سنين بعيون واسعة بتعيط وشفايف حمرا صغننة

وخالتو حنان عندها  7 سنين بايديها الصغيرة بتمسح عينيها

وخالو راجل صغير واقف بيعيط من تحت لتحت وعيونه الخضرا مليانة دموع وزامم علي شفايفه اوي

..شفتهم صغيرن اطفال حولين اختهم الكبيرة ايلي كانت هتروح منهم

ومن ساعتها مش عارفة ابص لهم غير بالصورة دي

ومن ساعتها حبتهم اكتر

..واستغربت نفسي هو انا حبتهم اكتر عشان شفتهم لحظة ضعفهم؟وارجع واقول لا ..منا شفتهم قبل كده كتير

انا بكتب في عن الموضوع ده من ساعة ما حصل و كل شوية امسحه واكتب تاني ..مش عارفة ليه

وعرفت ليه انهاردة انا حبتهم اكتر ..عشان شوفت حبهم لبعض ..حب الاخوات ايلي عانوا سوا وضحكوا سوا وعيطوا وحضنوا بعض سوا

..عارفين؟اعتقد ان امي كبرت عشرين سنة بسبب اليوم ده

علي فكرة دي المدونة بتاعت ماما :)

http://farakaa.maktoobblog.com

Advertisements

2 Responses to “السبت 10 يناير 2009”

  1. أمل 06/05/2009 at 3:38 AM #

    أنا كمان حبيتهم أكتر … ربنا يخليكم لبعض ويبعد عنكم كل شر

    على فكرة انتي ورثتي عن مامتك السلاسة والبساطة في التعبير :) …. انتوا عيلة جامد من الآخر

    بس أجمل حاجة اني عرفت الاسامي الحقيقية لأبطال القصة

    فاتن هي فريدة
    وحنان هي حياة
    وهدى طبعا عارفين من الاول انها حبيبة قلبي ميمي

    فاضل خالك … اسمه محمد ولا لأ؟
    أكيد أكيد مش حقول لميمي اني قريت حاجة :) بس بصراحة انا فرحانه ان بعض الاحداث عرفتها

  2. Cinderella 06/05/2009 at 9:42 AM #

    يا امل يا اروبةةةةةةةةة :D

    جبتي الاسامي صح :)

    محمد هو احمد ;)

    اي خدمة

    ويارب اكون واخده ربع سلاسة وتعبير ميمي :)

Have something to say?

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: